八十年代

昨晚係 Karma 個 blog 睇到八十年代的電影戲飛，令我想起八十年代嘅演唱會飛就更精美，同而家嘅電腦飛真係不可同日而語。附圖第一張就係我成世人第一次睇嘅演唱會–林子祥；83年要 HK$120，最貴係 HK$180，二十三年前嘅事！

另外一張林子祥演唱會飛係我最鍾意，嗰次演唱會唔同日子有唔同款式嘅飛，我個同事嗰張係「愛到發燒」嘅猩猩大頭。

仲有一張係「倫伯」出咗「霧之戀」之後84年第一次係紅館開演唱會嘅飛，當時倫伯幾「玉樹臨風」！咦！「露底」tim! 

機場落日

我係屋企都望到同一個景，但住低層，所以祇睇到部分，「海市蜃樓」就見唔到，但仍可在黃昏時見到「咸蛋黃」全隻。

可惜攝影技術不精，所以冇類似照片可作比較。

幾米的秘密花園

上星期四放工後去咗香港藝術中心睇「幾米的秘密花園」；其實唔算好多嘢睇，祇係展出大約各十幅「月亮忘記了」及「又寂寞、又美好」內的畫。仲有幾幅係「微笑的魚」、「地下鐵」、「向左走、向右走」等。仲有放咗三個大約兩尺高的「小蝴蝶」、「小披風」及「微笑的魚」主角公仔。但最多人合照係「微笑的魚」主角公仔，但我比較喜歡「小蝴蝶」。另外仲有「月亮七個半」舞台劇的製作過程部分記錄及道具。HK$30入場費有精美門票、報事貼、postcard .......仲可以任影場內任何嘢，都算「值回票價」啦（影咗Ｄ公仔和畫可以做 wallpaper，我見有人差不多所有畫都影）！仲有場內放咗幾本幾米的書，有新有舊；我都「打釘」睇咗「藍石頭」！