為乜呢？

Blog友蔡太話我咁多怨言都係舊公司撑到十二年。咁我就檢討吓我為咩係呢間公司。第一樣諗有咩令我留低；諗來諗去，原來冇乜開心回憶。除咗間中係工作上有D滿足感外，其餘都係同利益扯上關係 - 5天工作、福利OK、人工唔錯（以我咁嘅qual）、大公司穩定.....；加上開始年紀漸長，做咗咁多年嘢，覺得「到處楊梅一樣花」，間間公司都有問題冇可能有完美，可接受眯得囉.......。點知終於最後真係去到不能接受嘅地步而請辭。

往者已矣，今年要從新上路喇（不過而家仲係起點休息中）！

Y!Blog真麻煩！

剛才Y!Blog有D問題，係我upload新網誌時重覆出咗兩次，咁係我delete其中一篇時，有位blog友剛剛回應，所以連個回應都delete埋；我不但睇唔到佢嘅回應全文，而且對佢好似唔係好尊重，不過我又click唔到佢個blog，所以係度講聲對唔住，如果呢位blog友睇到呢篇blog，可以的話請再留言。謝謝！

 

回應網誌/圖片：在Big4工作的日子

雖然我只係一個做過十年嘅爛鬼會計,但係都明白big4係咩嘅一回事,只要一日唔走,你都要捱落去,咩嘢大公司體諒員工果d... 《 詳文 》

檢視文章

我在Big4的日子

如果blog友們唔明標題中Big4嘅意思，咁可能對以下呢篇blog冇乜興趣（不過都希望同各位分享一下）。

我係Sina Blog睇到一篇文章(你想在Big4工作嗎？)有好大感觸（雖然覺得文章有D過份負面）；因為我剛剛離開一間工作咗12年嘅 Big4 firm ，雖然我係support department做，但都略知professional departments （賺錢部門就叫professional！）情況。

OT真係好嚴重（不論professional or support departments），甚至隨時「通頂」；如果出job(trip)就更加辛苦；以我做過呢間公司為例，近在深圳、珠海，遠至拉薩、哈薩哈（係邊？我好多同事都唔知係邊，哈薩哈其實係中亞國家），名副其實上山下鄉，好多人捱唔住病倒甚至要辭職。我就知道有人要係拉薩度過聖誕、新／舊曆新年都未返過香港。我諗好多父母諗住個仔讀呢科到大學畢業會坐寫字樓、嘆冷氣，點都估唔到做會計師要孭背囊，拉住個裝滿文件嘅大旅行袋去做嘢，所以Ｄ人流動性好大（捱唔住）。

有D support部門老細更加唔俾人 claim OT，以免工資 over- budget。我個部門雖然俾 claim OT，但你勤力肯OT就覺得你呃鐘或工作效律有問題；你唔想OT咁多而係工作時間不停做（toilet都唔去），倒頭來會覺得得你工作量有空間增加，因此越來越多嘢做。所以係呢度做要學識「控制工作進度」，以達致「平衡」- 有OT但不過多而招來「質疑」；亦不會過少而招致「加工」。我個人係呢方面都有D心得；不竟有12年「功力」。但咁樣唔代表我接受呢種「文化」。

仲有一樣就好似文中提到嘅「放飛機」（又係要行內人先明）；係呢 D Big4 大公司做，好多時花哂D時間做埋D「門面」嘢；例如：老細為求安心會要求我地核對hard copy後，係密密麻麻好多items嘅spreadsheet上每個item旁邊用筆剔一剔，俾佢覺得你有對過D嘢，其實佢地衹係見到D剔就算，唔會理你有冇真係check過。實則 D hard copy 上嘅嘢同spreadsheet 係嚟自同一個source，資料一定相同，分別衹係presentation format。check 多一次係如果好得閒就話啫，鬼咁多嘢做邊有時間丫，唯有唔逐項對，祇係揸住支筆係咁剔（仲要兩個人剔兩次），咁都好花時間(呢個方法用咗咁多年都冇出事 ，有試過揾temp staff幫我剔tim)。所以好多時間都係咁浪費咗；試過提出唔想做呢D無謂嘢但被manager拒絕（大公司文化 – 做開冇事唔好改）。

有時為咗工作方便影印好多copy，公司雖然提倡環保，又係office設置紙張回收箱；又鼓勵用印過唔要嘅紙另一面再影印或printing。但好多時同事貪方便或為免整壞影／打印機（因為放「舊」紙入機容易jam），因此下下用新紙，橫掂係公司俾錢買，但整壞部機就俾人話「揾嘢嚟搞」；我就俾人「勸喻過」呢。

以上只係冰山一角；可能好多大公司（包括政府機構）都有咁嘅情況；正所謂「官僚」! 就算有機會同上層反映，佢地唔係話「人人都係咁做」、「冇辦法，係咁嫁喇」、「要有証據證明你嘅工作量過高」；又或者同佢地透露感到精神緊張，每逢週日就不其然感到恐慌，唔想返工；佢地就好似講笑咁話：「我都成日唔想返工喇」嘅類似說話嚟回應你，覺得你嘅問題好小事，係你將D情況放大咗啫。到我真係辭職，佢地唔想你走（要請過一個新人搞好嘢又冇咗個人幫手recall memory-因為好多時要跟做開嘅practice做，但往往呢 D practice 係冇black in white，純粹靠人腦記憶）就叫你去尋求專業輔導嚟解决問題（呢間公司由去年開始唔知係唔係真係發覺好多人因為咁出現問題而影響工作甚至離職所以提供呢項服務）。其實問題根源唔解決，對於我嚟講係冇幫助（D「專業」輔導員所講嘅我都識講喇 – 放輕鬆D、唔好理人地講嘅嘢、返屋企就唔好再諗公司嘢....但係我老細叫我D嘢係公司冇時間諗就利用放工之後嘅時間去諗）。

正如嗰篇文章提到一個電視節目（我都睇過）映過一間Big4（唔係我做過嗰間）嘅chairman/senior partner（？？-唔係好肯定）夜晚會巡視成個office「趕」D職員收工，但員工如果真係收工而第二日交唔到「功課」，咁可唔可以話大老闆叫收工所以做唔完？.....答案多數係.....你咁大個人唔識諗ga？

呢個遊戲唔係人人啱玩，但仍然有人因種種原因在自願或非自願地繼續，我仍對各位業界深感佩服和尊重。

早餐

(註: 照片因在網誌搬家時消失了而欠奉)

以上的雙腸煎雙蛋是不是很醜樣？但對於一個既不喜歡又極少煮食的人來說，成功完成這個早餐已是踏出第一步。

p.s. 不過以後都係去大家樂食早餐算喇，乾手淨腳！

身外物

一月二日正式告別舊公司，但由去年十二月三十日開始分三日從辦公室帶回三大袋雜物（十二年三袋不算多吧），但忙這忙那至今晚才真正執拾好。帶回的東西包括杯、暖水壺、字典、各式磁鐵／擺設、計算機、涼鞋、外套、照片甚至鐵罐（當然是有特別款式），立立雜雜一大堆，原來多年來累積了這麼多物件；其實一個人一生會積聚多少「身外物」呢？我跟姊姊搬來現址住了八年，更加見證了由一間「吉」屋變成「雜物滿屋」。

悠長假期的開始

今天開始了我的無業生活。昨天最後一日工作仍逃不過OT的「宿命」 - 需要6：45 PM才「放工」（我的工作時間其實是8：30AM - 5：30PM）；我的那個所謂「下屬」仍在最後一刻給我文件核對，好像忘記我這天是last day （我連工作証也交還人事部了），更不要說跟我say goodbye (不過都預咗）。而自己部門則在差不多五時召集所有同事作一個簡單儀式，宣佈我的離職（其實差不多人人都知）及歡迎剛剛加入的兩位新同事，並送給我離職禮物 - iPod nano (8GB)；之後大家就吃着我掏腰包買的西餅，「係咁咦」看一看我那份禮物（因為那份禮物很快就傳回我的手上），大家便各自各聊天，跟平時每月有同事生日沒兩樣。

我還買了朱古力拿去一些相熟的部門分享兼say goodbye。得到最多的回應是 - 恭喜晒！又有人跟我「大吐苦水」 - 訴說對公司和工作運作的不滿。

到真正離開office的時候，出奇地沒有特別的感覺，跟平日下班沒兩樣。在乘港鐵回家時發了個SMS給同事D，因為我由第一日在這間公司工作時一直得到她支持和關照，所以我一早預了她是唯一send SMS say goodbye的同事。

我的工作生涯就在此暫停........

開始／結束

今天是2008年的第1天，明天是第1個工作天，亦是我在現在工作的公司最後1天。回望2007年，發覺工作問題佔了很大篇幅，九月之後更去到爆發點；一直類積的問題而形成的壓力，已對我身體做成影響，所以不得不在工作路上暫停一會。

希望新的一年有新開始...............先做一個閒人吧！

祝各位新年一切順利，心想事成!（嘩！拜年呀？）