今年唔知點解好多人去北海道，可能夏天冇地方好去，除非去德國睇世界杯。剛剛有個同事去完北海道、大阪 honey moon返來，其中係北海道仲自己揸車。佢話都唔錯，油錢比香港平，但公路費就好貴，要大約HK$300，行一個鐘頭左右。六月北海道仍比較涼，薰衣草田還未開花；聽講今年要七月尾才開。
另外一個同事前日由北海道返，要下星期一先返工，去之前聽佢講，機票連兩晚酒店要六千幾一位。另外三晚住民宿每位四千円，JR pass (北海道)又要千幾，去六日加加埋埋旅費已經每位超過HK$10,000，仲未計食同買，所以日本真係「消費强國」。但下個月仍有另外兩個同事又係去嗰度，所以日本就算消費幾高都不愁冇旅客。
我今年都計劃十月尾去日本，但就同潮流「背道而馳」– 東京。因為七年未去過，好多新景點／項目都未去過(好多而家都唔算新)，好似六本木山、Disney Sea、三鷹美術館等。而且想去埋橫濱。不過已經打算下年去北海道或九州；特別係九州 – 我第一個去嘅日本地區，已經係十年前嘅事！
