真人表演 @-@

上一篇網誌得到blog友回應，令我想起係Ｎ年前曾經係地鐵車廂見到更「經典」嘅嘅同類情景；當時係兩個三、四十歲男女係度「真人表演」，個女嘅係咁又摸又錫個男嘅（有聲嘅），完全旁若無人咁，當時車廂都幾多人，我就企正佢地前面睇得好清楚，可惜當時未有手機可以影相、拍片，唔係可以寄去亞視「第一手真相」有五嚿水！

擺 post??

小姐！想温馨就去公園啦！呢度係巴士站嚟ga，唔該唔好攬住啦，向前行先！

溏心風暴 - 我同社會脫節？

係呢套劇初播時已經寫過一篇blog -
http://puccagaru-pucca.blogspot.hk/2007/04/blog-post_22.html
點知套劇越嚟越受歡迎，但我完全唔覺得套劇有乜特別，手法仲係停留係九十年代（原來係劉家豪監制），可能Ｄ人係鍾意呢類嘢。而家d人知識水平高咗，但套劇仲用d不合常理嘅情節地去遷就劇情就有D牽強同手法低劣，大大影響劇情嘅感染力；好似為咗要楊怡小產而安排佢做model竟然要自己踏上張凳去攞衫而跌倒冇咗個胎（佢已經現哂肚），咁易冇D人就唔駛去深圳啦，同場仲有李司祺同陳法拉可以隨便入fashion show後台探楊怡（唔駛事先安排，因為楊怡唔係事先知道）咁嘅安排係為咗方便「劇情需要」佢地兩個在場，但就當咗觀眾好無知（但事實又好似係）；仲有之前劇情話李司祺同關菊英講冇正式娶佢入門係因為個時剛剛實行一夫一妻制，但呢條法例係71年實行，咁細契應該入咗唐家三十六年，仲要十幾年先有個仔（阿歡），因劇情話呢個仔好似得二十幾歲，昨晚嗰集仲講細契扮大肚，嘩！佢都有講自己入門三十年啦，四十幾五十都有仔生，仲要有人信先覺得劇中人唔係低能就係冇血冇肉，「角色」一個而已。咁嘅水準依然有人話劇本寫得好，我真係同社會脫哂節，而係Ｄ人都仲係睇嘢好表面，睇戲鍾意忠奸分明，所以TVB設計Ｄ角色都係主角（特別係女主角）係好人到好似聖人咁，真係好懐念丁蟹呀！
最近有睇言成旭嗰套「白色巨塔」，雖然都好似「妙手人心」嗰種劇，但幾欣賞另一個男主角「邱慶成」（載立忍飾演），個角色係一個好實際、重利益嘅副主任醫生，屬於中層管理人員，看似好勢利，但其實衹是做人比較實際，同言承旭飾演嘅蘇怡華成為一個對比，各有優點缺點，我覺得呢種角色設計比較貼近現實，令觀眾有共嗚。可惜呢套劇好似收視率唔係幾好，但「溏心風暴」嘅收視率都唔係好到同形成嘅熱潮成正比，我諗除咗係網上有得睇之外，還有係傳媒「煲」大咗佢，好多人係人講你又講，但實際唔係個個都日日追看，所以變成「講」多過「睇」。

唔知係咪自己由細睇電視大，特別係TVB，連「佳視」都睇過（又「露底」tim！），仲有睇鳳凰衛視同華娛，所以連台灣節目都有睇，祇係冇乜睇過有線。我而家睇ＴＶＢ劇集見到用邊個演員做邊個角色就知劇情會點發展；例如用一個二線以下嘅女藝員做男主角嘅女友就知做多幾集就分手，如果個女藝員知名度高一Ｄ咁就會係最後幾集再出場「返鎅」男主角去製造所謂高潮，呢個情形最多出現係Ｄ唔算係「重頭戲」嘅時裝劇，所以真係完全冇「追劇」嘅意欲。

係度順便希望ＴＶＢ唔好再經常係結局安排主角（特別係女）俾反派主角收埋唔知喺邊但又問唔到個反派，呢條橋由以前「天地男兒」到最近「天機算」都仲用緊，ＴＶＢ都幾喜歡將Ｄ橋用完又用，好似以前係不同時代背境都出現嘅許願樹、日劇「悠長假期」因為係車上幫人而留低文件嘅情節，ＴＶＢ劇本真係好似執藥，要咩就係file度摷返出嚟用。

多災多難

估唔估到上面張相係乜？答案係我屋企廁所坐廁沖水制，係咪有d怪！因為個手柄斷咗，變成咁樣。係度住咗八年，個廁所維修得最多；試過牆內熱水管漏水，要成幅牆拆開哂嚟整；又試過坐廁突然噴出污水（好似噴水池噴到假天花咁高），之後管理處要揾清潔工人幫我地清理tim！呢兩個cases真係無妄之災！

注意：水箱旁邊條毛巾原本唔係黑色！

(註: 文中提及的照片因在搬遷網誌時消失而欠奉)

婚姻狀況

最近睇咗一位blog友寫嘅好笑嘢，令我記起好多年前一個同事講嘅真人真事..................................

有一日，有個男人去一間製衣廠見工；

職員：填份表先啦！（就咁俾咗張中文嘅履歷表個男人填）

男人：（望住張form心諗）要填d乜嘢ga .........

姓名  .....  xxx

性別 .....  男

年齡 ..... 3x

地址 ...... xxxxxxxx

電話號碼 ........ xxxxxxxx

身分證號碼 ........ xxxxxx

出生日期及地點 .......... 195x年x月x日/中國惠陽

婚姻狀况 .......... ???

 （心諗：點填呀？）

..............................  （心諗：就咁填啦！）...........................................................

..........................................................................................................................................

>

>

美滿

夜冷店

昨天逛花園街，走入著名的裝飾品夜冷店「譚才記」，原來它即將搬遷到同街另一鋪位，但店內貼上照片中的告示–在香港真的好少見店鋪會這樣做，特別老闆向來做生意態度比較cool（昨日未見露面），想不到這間傳统商店會好像日本人會這樣表示心意。

喜宴

好多時參加朋友婚宴=朋友聚會，去唔去好可能因為有邊個朋友出席先去；反而主人家唔係最重要，因為每次出席婚宴恭喜完新人，同佢地影完相就冇機會同佢地講嘢，直至散席先再同佢地握握手–招呼唔到。

以前未有網上登記同婚禮見證人方式之前，好多準新人為咗係所謂「好日」結婚而要瞓街通宵排隊，聽人講最少瞓一晚（一般通勝寫「宜嫁娶」嘅日子）；如果係全年最好日更加要瞓兩晚街

。我當時曾有個想法–有冇人做過統計，係某年全年最好日結婚嘅夫婦嘅離婚率。

我都聽過有人話就算有網上登記都會選擇排隊，因為覺得有誠意d。原來有d人覺得做d表面行為代表誠意好重要，所以近年二月十四日情人節俾消費行業催捧得連阿公阿婆都要慶祝，加上傳媒催谷，更加要做d比較「戲劇化」行為；係大屏幕登愛的宣言，甚至上電視出鏡講（一擲千金），有錢就登報紙講。  

係咪應該將心思放番係實際兩個人嘅關係先最重要。