茶餐廳

佐敦白加士街有一間叫「澳洲牛奶公司」嘅茶餐廳，經常都人頭擁擁，睇佢個名都知有燉蛋嗰類嘢食，但實際最多人食嘅係上面張相裡面個餐牌上嘅茶餐，特式在個餐所包括嘅嘢全部可以改；我通常會由「义燒湯意粉／火腿煎雙蛋／牛油方包」轉做「牛肉通粉／火腿炒蛋／多士」（唔駛加錢），基本上變成另一個餐，個餐牌唔會寫但非常有彈性，唔似其他茶餐廳寫明否則冇得改。呢D食品種類少甚至冇飯／公仔麵／米粉供應嘅舊式茶餐廳／冰室而家越嚟越少，取而代之就係「翠華」嗰種睇嚟好先進（電腦落單）、好有效律但係永遠都係見到Ｄ侍應生（樓面）走來走去，但好難先叫得住佢落單（可能真係人手不足）。「澳洲牛奶」估計樓面有成廿個，清一色係廿幾至四十幾嘅男人，同而家好多茶餐廳好唔同，佢地為慳錢請哂Ｄ冇經驗嘅師奶，落單都聽唔掂，有時要就吓佢地寫完一樣先再講下一樣嘢。「澳洲牛奶」有樣唔好就係雖然效律高，但氣氛好緊張，你呢頭落完單唔駛兩分鐘就所有嘢嚟哂，Ｄ人快食完走，佢地又可以做多轉生意，唔係點請咁多樓面招呼Ｄ客，安排座位，快Ｄ落單，快Ｄ有嘢食，快Ｄ走得，真識做生意，所以傳统嘅經營手法其實都好work ga！講到重點–食物，佢Ｄ嘢掂ga！特別係炒蛋，好多茶餐廳Ｄ炒蛋似煎蛋整碎或者直情似煎蛋。所以而家有機會去開嗰頭都會幫襯吓，唔知幾時輪到佢又消失。以前旺角通菜街（女人街）有一間呢類茶室，規模比「澳洲牛奶公司」細好多，又係有燉蛋食，但前排去已經執咗，嗰間令我記得係佢個餐牌；攝喺枱面玻璃下嗰種，半張A4紙咁大，上面印咗三種餐嘅內容，由上而下–早餐、茶餐、快餐，特別在每項旁邊都有個代表圖案–早餐係日出、茶餐係茶杯、快餐係火箭，線條好簡單但一睇就明而且好配合內容，可惜我以前冇影底。