回到從前

上面第1張相係我上星期六新配的眼鏡，亦係我「闊別」兩年幾嘅「日用品」；係05年之前佢的確係我由F.1到當時嘅「日常必需品」，後來仲有包括隱形眼鏡。05年1月做咗激光矯視手術（我曾寫過一篇blog關於呢件事）之後便同佢say goodbye（上面第2張相係我做手術前最後一副眼鏡）；嗰時醫生已經同我講過可能會仍然有不多於三百度的近視出現，之後的確左、右眼各有二百及一百度嘅情况，但日常生活及工作都唔駛戴眼鏡，但最近因可能要應付工作上新系統嘅講解，吸取上次係剛做完手術之後曾經係上堂學新電腦程式應用時睇projector screen吃力追唔上嘅教訓，所以今次做好準備。

眼鏡度數同我F.1初戴眼鏡時差不多，有d回到以前嘅感覺；唔同嘅係以前由第一日開始就成為「日用品」，而家就好日都唔會戴一次（呢個都係我之前唔配眼鏡嘅原因），而且度數唔深，眼鏡個look都好d，因為唔會好似千度近眼鏡咁多限制，又唔會見到鏡片上有咁多「圈」。