N個遲到／請假的理由

唔知醒

試過有同事過晒鐘仲未見返工，打電話去佢個手電先「如夢初醒」話即刻返嚟。但有D會早一步打電話返嚟承認瞓晏咗，理由係唔舒服食咗藥所以起唔到身 .....佢唔係第一次，包括冇食藥；點解唔set鬧鐘呀？我都試過鬧鐘唔響瞓晏咗，同事打電話嚟我就「最佳女主角」上身，即刻話唔舒服（啱啱瞓醒把聲未開就更加傳神），睇下一陣會唔會好D咁就會返工。呢個理由唔止我一個用過ga！

 

塞車

呢個係香港最「行」嘅理由；但係日日都係嗰個時間搭嗰班車，又冇特別意外，無喇喇點解會塞車，箇中可能是事實，但不排除同上一個原因有關，因為我試過有同事打電話返嚟嗰陣佢個背景非常靜；係香港有邊種交通工具咁寧靜？可能只有屋企........佢係屋企已經知會塞車兼遲到。

 

睇醫生

好多人喜歡工作時間去睇醫生，但又唔駛請病假，其中有D因為醫生嘅睇症係只有辦公時間，所以無可厚非。但有D人連洗牙都約係自己工作時間咁就有點那個。

 

個仔／女病咗

為人父母最多時因為咁而要遲D返工甚至請假。所以以前有D公司唔係好鍾意請D有仔女嘅員工，特別係女性，因為驚佢地要成日請假，好似而家少咗呢D情形，因為D公司怕俾人告佢地歧視。

 

詐病請假

有時因為冇晒大假，所以有D人咪話病囉；病假紙好易攞....我唔係話做假文件，其實你去睇醫生，同醫生講咩咩唔舒服，好多時私家醫生唔會質疑你，仲會肯俾病假，醫藥費可能仲有公司俾（claim保險）；所以有D公司要職員睇指定或政府醫生。試過有教師因為要幫好友做伴娘但又唔可以用呢個理由請假唯有講大話請病假（PG家長指引：小朋友唔好學Miss講大話呀！）

 

其實理由千奇百怪，真係講都講唔晒，呢度只係「冰山一角」。